Հենրիկ Իգիթյանի անվան գեղագիտության ազգային կենտրոնը (ԳԱԿ), որը հիմնադրվել է 1970 թվականին արվեստաբան Հենրիկ Իգիթյանի և մանկավարժ Ժաննա Աղամիրյանի կողմից, գտնվում է Հայաստանի մայրաքաղաք Երևանում ու իր տեսակի մեջ առաջինն էր Խորհրդային Միությունում: Մանկական ստեղծագործության թանգարանը, որն ի սկզբանե որպես պատկերասրահ բացվեց մի փոքրիկ ցուցահանդեսով, հետագայում ստեղծեց մեծ մշտական հավաքածու՝ ներառելով շուրջ 150․000 ստեղծագործություն Հայաստանից և աշխարհի 100 երկրից։ Ներկայումս մշտական ցուցադրությունը ներառում է գծանկարներ, բատիկայի, ասեղնագործության, մետաղե, փայտե, քարե, կերամիկայի աշխատանքներ և նկարներ: Մանկական պատկերասրահը հիմք ծառայեց, որ 1978-ին ստեղծվի Գեղագիտության ազգային կենտրոնը (ԳԱԿ)։ 1980-ականներին ԳԱԿ-ն ընդլայնվեց մայրաքաղաքից դուրս՝ հիմնելով մասնաճյուղեր Գյումրիում, Սևանում, Գորիսում, Մեղրիում և Վանաձորում, հետագայում հասնելով Տավուշի մարզի Բերդի նման սահմանամերձ համայնքներ: Կենտրոնի կերպարվեստի, կատարողական արվեստի ու երաժշտության ծրագրերին տարեկան ուսանում է 6-16 տարեկան ավելի քան 3000 երեխա, որոնցից 1600-ը՝ անվճար հիմունքներով։ Վերջին տարիներին կենտրոնն ընդլայնել է գործունեության շրջանակն ու իր ծառայություններն է առաջարկում ոչ միայն երեխաներին, այլև արվեստով ու արվեստային կրթությամբ հետաքրքրված բոլոր անձանց։ Հասցե՝ Երևան, Աբովյան 13