Էդիկ Բաղդասարյան

Էդիկ Բաղդասարյանը 2001 թվականին հիմնադրված «Հետք» հետաքննական առցանց պարբերականի գլխավոր խմբագիրն ու համահիմնադիրն է։ Նա նաև «Հետաքննող լրագրողներ» հասարակական կազմակերպության հիմնադիրներից է։

Լրագրությամբ զբաղվում է 1988-ից։ Ղեկավարել և մասնակցել է կոռուպցիայի, պետական գնումների, մարդկանց թրաֆիքինգի, բնապահպանության և այլ թեմաներով հետաքննությունների։ Նրա աշխատանքերն արժանացել են միջազգային մի շարք մրցանակների, այդ թվում՝ «Գլոբալ Շայնինգ Լայթ» մրցանակին և Բուցերիուս հիմնադրամի՝ «Մամուլի ազատությունն Արևելյան Եվրոպայում» մրցանակին։

Մասնակցել է միջազգային խոշոր հետաքննությունների, այդ թվում՝ «Պանամայի փաստաթղթեր», «Դրախտային փաստաթղթեր», «Պանդորայի փաստաթղթեր» և «Շվեյցարական գաղտնիքներ» նախագծերին։

Հետաքննող լրագրողների միջազգային միավորման անդամ է։ Հեղինակել է «Հետաքննական լրագրություն․ հայկական փորձը» գիրքը, որը որպես դասագիրք օգտագործվում է Հայաստանի տարբեր բուհերի լրագրության ֆակուլտետներում։