Արսեն Աբրահամյան
Արսեն Աբրահամյանը ճարտարապետ է և ուրբան հետազոտող։ Նա «Մշակութային և սոցիալական նարատիվների լաբորատորիա» (CSN Lab) հետազոտահեն մշակութային կազմակերպության անդամ է, որտեղ ներգրավված է ճարտարապետական և ուրբանիստական թեմաներին առնչվող հետազոտական աշխատանքներում և նախաձեռնություններում։ Արսենը նաև իր նախագծային գործունեությունն է իրականացնում «Ստորակետ» ճարտարապետական արվեստանոցում։
Նրա հետազոտական հետաքրքրությունների շրջանակը ներառում է ուրբանիստական տարածքների փոխակերպումների և դրանց պատճառների, քաղաքային միջավայրերի և հանրային կառուցվածքների փոխհարաբերման, բնական լանդշաֆտի փոխակերպման և գաղութացման, տեղահանության և տեղի հիշողության, ինչպես նաև ճարտարապետության և քաղաքային տարածության սոցիալական, մշակութային ու մարդաբանական հիշողության հիմնահարցերը։
Վերջին տարիներին CSN Lab-ի բազմամասնագիտական թիմի հետ Արսեն Աբրահամյանը նախաձեռնել է համաժողովներ, երկխոսության ծրագրեր, աշխատարաններ, ցուցահանդեսներ, փոդքասթներ և ներգրավված է եղել խոշոր հետազոտական նախագծերում, ինչպիսիք են «Կոնդ. հիշողության տարրերը», «Գետառ. գետի հիշողությունը», «Կեչուտ. հիշողություն ջրի հատակին» և այլն։ Միջառարկայական և ներառական նախագծերի միջոցով, փոփոխվող իրավիճակի և կտրուկ զարգացումների պայմաններում, Արսեն Աբրահամյանը և CSN Lab թիմը անդրադառնում են Հայաստանում և Հարավային Կովկասի տարածաշրջանում առկա մշակութային խնդիրներին և մարտահրավերներին:
Արսենն այժմ աշխատում է իր թեկնածուական ատենախոսության վրա, որն ուսումնասիրում է Երևանի քաղաքային լանդշաֆտի շերտավորումը, նրա սոցիալ-մշակութային և քաղաքական շրջանակը և դրանից բխող ժամանակակից քաղաքային մարտահրավերները: